21.09.2012 19:43

Icelandair Group efnir til ráðstefnu um framtíðartækifæri íslenskrar ferðaþjónustu næstkomandi þriðjudag, 25. september á Hilton Reykjavík Nordica. Ráðstefnan er haldin í tilefni af 75 ára afmæli félagsins, sem gegnir lykilhlutverki í ferðaþjónustu hér á landi, og fyrirlesarar eru einstaklingar með ólíkan bakgrunn og sýn.

Þeirra á meðal er Ólafur Ragnar Grímsson, sem flytur erindi, sem hann kallar “Áfangastaður á veraldarvísu”. Ólafur Ragnar hefur haft einstakt tækifæri til þess sem forseti Íslands að kynnast ólíkum skoðunum og viðhorfum til lands og þjóðar, meðal almennings og fjölmiðlafólks um allan heim og meðal helstu ráðamanna nær og fjær. Í erindi sínu mun hann greina frá reynslu sinni og sýn á þau áhrif sem sívaxandi áhugi á Íslandi hefur á sjálfsmynd þjóðarinnar og framtíð hennar sem ferðamannalands.

Björgólfur Jóhannsson, forstjóri Icelandair Group mun fjalla um hvernig byggja á upp ferðaþjónustu á heimsmælikvarða á Íslandi og hvernig áframhaldandi uppbygging félagsins mun styðja við það markmið. Hann mun einnig gera grein fyrir þeirri þróun sem hann telur nauðsynlega í íslenskri ferðaþjónustu og hvernig Icelandair Group getur lagt sitt af mörkum til að efla áfangastaðinn Ísland.

Þeir sem heimsótt hafa Kaupmannahöfn á undanförnum árum átta sig á því að Tívolí, sem áður var ávallt lokað á haustin, dregur nú að sér milljónir gesta yfir vetrarmánuðina. Søren Robert Lund, arkitekt hefur stýrt hönnun og þróun skemmtigarðsins undanfarin 15 ár og mun kynna áhugaverðar hugmyndir um það hvernig arkitektúr og hönnun geta breytt upplifun og ferðaþjónustu hér á Íslandi.

Magnea Þórey Hjálmarsdóttir, framkvæmdastjóri Icelandair hótelanna mun stikla á stóru um helstu áskoranir sem nú blasa við ferðaþjónustu á Íslandi og nauðsynleg skref til að tryggja fyrsta flokks upplifun fyrir ferðamenn á Íslandi.

Emiliano Duch, forstjóri competitiveness.com í Barcelona er náinn samstarfsmaður Dr. Michael Porter og einn helsti frumkvöðull og sérfræðingur heims í klasafræðum (e. cluster theory). Hann er gjörkunnugur aðstæðum íslenskrar ferðaþjónustu og talar um leiðir til að auka hagnað í henni.

Fyrir þá sem starfa í ferðaþjónustu á Íslandi er það næstum eins og að líta í spegil að hitta kollega frá Nýja-Sjálandi, svo líkar eru aðstæður þó löndin séu sitt hvorum megin á hnettinum. Gregg Andersson framkvæmdastjóri hefur starfað bæði í Bretlandi og Bandaríkjunum við að markaðssetja ferðamannalandið Nýja-Sjáland og hann mun deila reynslu sinni og hugmyndum.

Ráðstefnan stendur frá kl. 13-17 og er öllum opin meðan húsrúm leyfir. Skráning er á icelandairgroup.com