15.05.2013 17:03

Í dag hefst í fyrsta sinn beint áætlunarflug milli Íslands og Alaska, þegar Boeing 757 þota Icelandair tekur á loft frá Keflavíkurflugvelli kl 17:10 síðdegis áleiðis til Anchorage.

Flogið verður samkvæmt áætlun tvisvar í viku til 15. september. Flugið til Anchorage frá Íslandi tekur rúmlega 7 klukkustundir, sem er lítið eitt styttra en t.d. flug til Seattle og Denver. Flugleiðin liggur í norðurátt frá Íslandi, yfir pólsvæðið, þannig að nú í sumar verða öll flugin í bjartri sól og miðnætursól á leiðinni frá Alaska til Íslands.

Alaska er stærsta fylki Bandaríkjanna að flatarmáli. Íbúar eru rúmlega 700 þúsund og þar af 400 þúsund í Anchorage og nágrenni. Alaska býr yfir miklum náttúruauðlindum og ferðaþjónusta sem byggir á stórbrotinni óspilltri náttúru er ein helsta atvinnugreinin.

“Töluverður straumur flugfarþega er á milli Evrópu og Alaska, bæði vegna öflugs atvinnulífs, sem m.a. byggir á fiskveiðum og olíu og gasvinnslu, og vegna ferðaþjónustu, en Alaska er mikil náttúru- og útivistarparadís. Þessir farþegar þurfa að millilenda í Bandaríkjunum á leið sinni. Með því að millilenda á Íslandi í staðinn geta þeir stytt ferðatíma sinn um nokkrar klukkustundir og í því felst sérstaða Icelandair á þessum markaði”, segir Birkir Hólm Guðnason, framkvæmdastjóri Icelandair.

Hér á landi er nú stödd viðskiptasendinefnd frá Alaska í tilefni af fyrsta fluginu. Hana skipa Susan Bell, viðskiptaráðherra fylkisins, Steve Hatter, aðstoðarráðherra samgöngumála, Rick Rogers, forstjóri auðlindaþróunarstofnunar, Julie Saupe, forstjóri markaðstofu ferðamála og Andrew Halcro, forstjóri viðskiptaráðs fylkisins. Þau hafa fundað með aðilum úr íslenskri stjórnsýslu og viðskiptalífi. Þau munu fljúga til sins heima í dag með Icelandair í þessu fyrsta beina flugi.

Mynd:
Fyrir brottför klipptu þau Björn Óli Hauksson, forstjóri Isavia, Susan Bell, viðskiptaráðherra Alaska, og Luis E Arreaga, sendiherra Bandaríkjanna á Íslandi og Birkir Hólm Guðnason, framkvæmdastjóri Icelandair á borða til marka upphaf flugsins með táknrænum hætti.