28.03.2016 21:50

Icelandair hóf í dag áætlunarflug til Orly flugvallarins í París. Icelandair hefur boðið upp á flug til og frá París um Charles De Gaulle flugvöllinn, en býður nú upp á flug á báða vellina.

Orly er 27. áfangastaður Icelandair í Evrópu, auk þess sem félagið flýgur til 16 áfangastaða í Norður-Ameríku. Orly er fjórði nýi áfangastaðurinn á þessu ári, auk Aberdeen, Chicago og Montreal.

„Orly flugvöllurinn er mjög eftirsóttur af flugfélögum og langur biðlisti eftir því að komast þar að. Þaðan eru mjög góðar tengingar innan Frakklands og til nágrannalanda í Suður-Evrópu, en lítið framboð af flugi til Norður-Ameríku. Orly býður því upp á spennandi tækifæri fyrir okkur og er kærkomin viðbót í leiðakerfi Icelandair“, sagði Birkir Hólm Guðnason, framkvæmdastjóri Icelandair þegar tilkynnt var um flugið.

Icelandair mun í sumar bjóða upp á 23 flug í viku til Parísar í sumar, 17 flug (2-3 á dag) til Charles De Gaulle og allt að 6 sinnum á viku til Orly.

Á þessu ári eru 40 ár frá því Icelandair hóf flug til Parísar. Lengi framan af var einmitt flogið á Orly flugvöllinn sem var aðal flugvöllur Frakklands áður en Charles De Gaulle var byggður á áttunda áratug síðustu aldar. Tæplega 30 milljón farþegar fara um Orly árlega og er völlurinn sá 13 stærsti í Evrópu. Hann er í suðurhluta borgarinnar, þykir þægilegur fyrir viðskiptavini og tengist mjög vel innlandssamgöngum í Frakklandi.

Á myndunum sést Boeing 757 þota Icelandair fá yfir sig vatnsboga í heiðursskyni frá slökkviliði Orly flugvallar, og á hinni myndinni klippa Arnaldur Haukur Ólafsson, sölustjóri Icelandair í Frakklandi og Valérie Senentz frá Orly flugvelli á borða til að fagna upphafi flugsins.