14.09.2011 11:06
  • Eykur flug um 13% milli ára
  • Allt að 400 flug á viku – 10 þúsund farþegar á sólarhring
  • 2 milljónir farþega 2012.  Áhersla á framboðsaukningu utan sumars
  • 52% vöxtur frá 2008 – 700 þúsund fleiri farþegar en 2009
  • Denver Colorado nýr áfangastaður

Flugáætlun Icelandair, dótturfélags Icelandair Group,  fyrir árið 2012 er sú stærsta í sögu félagsins og um 13% umfangsmeiri en á þessu ári. Nýr heilsárs áfangastaður, Denver í Colorado, bætist við og ferðum er fjölgað til ýmissa borga í Bandaríkjunum og Evrópu.
Gert er ráð fyrir að farþegar félagsins verði um 2 milljónir á árinu 2012, en samkvæmt áætlunum verða þeir tæplega 1,8 milljónir á árinu 2011.  Alls verða 16 Boeing 757  flugvélar nýttar til áætlunarflugsins næsta sumar, tveimur fleiri en á þessu ári.  Flugvélar félagsins munu taka á loft allt að 400 sinnum á viku yfir sumarið og farþegafjöldinn mun verða um 10 þúsund manns á sólarhring þegar mest lætur. Stækkun leiðarkerfis Icelandair er í takt við þá stefnu Icelandair Group að byggja vöxt samstæðunnar innan frá.

„Við erum að grípa tækifæri til þess að vaxa með arðbærum hætti. Áætlanir fyrir yfirstandandi ár eru að ganga eftir og markaðsrannsóknir okkar erlendis sína að framundan eru möguleikar sem við viljum ekki láta framhjá okkur fara. Okkur er full alvara þegar við segjumst ætla að auka ferðamannastraum utan háannatímans og það hefur m.a. haft áhrif á þá ákvörðun að hefja flug til og frá Denver í Colorado allt árið um kring. Við sjáum fyrir okkur að vetraráætlun 2012-2013 verði meiri að umfangi en sumaráætlun var fyrir tveimur árum “, segir Birkir Hólm Guðnason framkvæmdastjóri Icelandair.

Mikill vöxtur hefur verið í starfsemi Icelandair á undanförnum árum. Vegna efnahagskreppunnar var dregið úr starfseminni árið 2008, en á tímabilinu 2009 til 2012 er vöxturinn í áætlunarflugi Icelandair um 52% og farþegum fjölgað úr 1,3 milljónum í tvær milljónir á næsta ári. Í ár er aukningin um 17% frá síðasta ári og vöxturinn er áætlaður um 13% á því næsta.

„Icelandair á 75 ára afmæli á næsta ári og það er ánægjulegt að fagna afmælisárinu með  stærstu og umfangsmestu flugáætluninni í þessari merku sögu.  Það er mikið umrót í starfsumhverfi okkar og nægir að nefna efnahagsmálin, náttúruhamfarir og heimsmarkaðsverð á eldsneyti í því sambandi, en starfsfólki Icelandair hér heima og erlendis hefur tekist að vinna mjög vel úr aðstæðum og fyrirtækið stendur traustum fótum og er reiðubúið í frekari vöxt“, segir Birkir.

Auk fjögurra vikulegra ferða til nýja áfangastaðarins, Denver í Colorado, mun Icelandair fjölga ferðum til Washington og Seattle í Bandaríkjunum, til allra höfuðborga Norðurlandanna og Þrándheims, Stavanger og Bergen í Noregi, til Billund í Danmörku, til Munchen, Amsterdam, Brussel og Parísar á meginlandi Evrópu og til Manchester og Glasgow á Bretlandseyjum. Alls verða áfangastaðirnir 31 á næsta ári. Vöxturinn yfir vetrarmánuðina er þó hlutfallslega meiri en yfir sumarið og það er liður í þeirri stefnu félagsins jafna hina miklu árstíðarsveiflu sem er í rekstrinum og fjölga ferðamönnum utan annatímans.

Icelandair byggir leiðakerfi sitt á staðsetningu landsins mitt á milli Norður-Evrópu og Norður-Ameríku. Með leiðakerfinu er Icelandair unnt að þjóna þremur mörkuðum; heimamarkaðinum á Íslandi, ferðamannamarkaðinum til Íslands og alþjóðlega markaðinum milli Evrópu og Norður-Ameríku. „Á árinu hafa áætlanir okkar á öllum mörkuðum gengið eftir. Verulegur vöxtur, eða um 20%, er á ferðamannamarkaðinum til Íslands á árinu. Sérstaklega hefur gengið vel nú síðsumars og ferðamönnum er að fjölga um 30% á haustmánuðum samkvæmt bókunum okkar.  Ferðir Íslendinga til útlanda hafa vaxið jafnt og þétt frá 2008 og gerum við ráð fyrir að sú þróun muni halda áfram. Þá hefur Icelandair náð mjög góðum árangri á þessu ári, líkt og í fyrra, á þriðja markaðinum sem félagið starfar á, þ.e. alþjóðamarkaðinum yfir Norður-Atlantshafið, og þar sjáum við tækifæri til að styrkja stöðu okkar enn frekar á næsta ári með nýjum áfangastað og aukinni tíðni“, segir Birkir.

Nýr áfangastaður, Denver í Colorado

Icelandair hefur ákveðið að hefja áætlunarflug til Denver í Colorado frá og með 10. maí á næsta ári. Flogið verður fjórum sinnum í viku allt árið.

Denver í Colorado er spennandi menningarborg að sumri sem vetri. Hún stendur nánast í Bandaríkjunum miðjum við rætur Klettafjalla þar sem eru einstök útivistarsvæði og einhver bestu skíðasvæði veraldar. Þar eru sólardagar yfir 300 á ári. Denver er mikil miðstöð samgangna og flugvöllurinn er sá tíundi stærsti í heimi og fimmti stærsti í Bandaríkjunum. Flugtími milli Íslands og Denver er um sjö og hálf klukkustund.

„Denver í Colorado hefur áhugaverða sérstöðu og hentar starfsemi Icelandair vel. Í fyrsta lagi er á þessu svæði töluverð velmegun, menntunarstig er hátt og áhugi á náttúru og útivist er meiri en víðast hvar annars staðar. Við ætlum okkur því að ná fjölda ferðamanna til Íslands frá þessu svæði. Í öðru lagi er þetta spennandi áfangastaður, m.a. vegna stórbrotinnar náttúru og hinna heimsþekktu skíðasvæða í Aspen og Vail. Það gerir okkur kleyft að fljúga jafn mikið á veturna og á sumrin til Denver, sem er óvenjulegt og mjög jákvætt. Í þriðja lagi er ljóst að flug okkar, með tengingu á Íslandi, er frábær kostur fyrir þá sem þurfa að ferðast milli Denver og ýmissa Evrópuborga. Lítið sem ekkert beint flug er frá Denver til Evrópu þó svo rannsóknir sýni mikið farþegastreymi og við ætlum okkur að ná í sneið af þeirri köku“, segir Birkir Hólm Guðnason framkvæmdastjóri Icelandair.

Denver Colorado er níunda borgin sem Icelandair flýgur áætlunarflug til í Norður Ameríku. Hinar borgirnar eru New York, Boston, Seattle, Minneapolis, Washington og Orlando í Bandaríkjunum, og Toronto og Halifax í Kanada.