11.05.2014 10:22

Icelandair hefur felt niður 10 flug félagsins síðdegis í dag 11. maí vegna verkfallsaðgerða flugmanna. Icelandair hafði áður fellt niður 11 flug til og frá landinu í morgun og því er samtals 21 flug fellt niður í dag. Um þrjú þúsund farþegar  voru bókaðir á þessi flug.

Flugin sem felld verða niður síðdegis eru til og frá Boston (FI631/FI630) Washington (FI645/FI644) New York JFK (FI603/FI602) Toronto (FI603/FI602) og Denver (FI671/FI670).

Skæruaðgerðir flugmanna hafa þar að auki valdið verulegri seinkun á flugi Icelandair í gær og í dag.  Farþegar eru hvattir til þess að fylgjast með upplýsingum um komu- og brottfarartíma enda geta orðið breytingar með skömmum fyrirvara.  Mikið álag er á þjónustuveri Icelandair og á starfsfólki á Keflavíkurflugvelli vegna þessa.

“Við biðjum viðskiptavini velvirðingar á þessari röskun ég vil fyrir hönd Icelandair koma á framfæri þakklæti til þeirra fyrir þann skilning og þolinmæði sem þeir sýna við erfiðar aðstæður," segir Guðjón Arngrímsson, upplýsingafulltrúi Icelandair.

Icelandair mun eftir fremsta megni reyna að leysa úr þeim vanda sem niðurfelling flugsins skapar viðskiptavinum m.a. með því að flytja þá yfir á flug annarra flugfélaga eins og hægt er, einnig að færa farþega á önnur flug Icelandair til og frá þessum áfangastöðum ef það er unnt eða breyta farmiðum með öðrum hætti. Þeir sem hætta við ferð sína munu fá endurgreitt. Nánari upplýsingar eru á Icelandair.is.