28.11.2011 16:26

Icelandair hefur tilkynnt að síðdegisflug félagsins, FI454/455 til og frá London, miðvikudaginn 30 nóvember, hefur verið fellt niður vegna verkfallsaðgerða starfsmanna bresku flugmálastjórnarinnar á Heathrowflugvelli. Eins og fram hefur komið í fréttum hafa bresk flugmálayfirvöld gefið út að miklir erfiðleikar og tafir verði þar á miðvikudaginn vegna verkfallsins og hafa hvatt flugfélög til þess að fella niður flug svo forða megi neyðarástandi. Þetta var ítrekað á fundi með flugrekendum nú síðdegis.

Icelandair hefur haft samband við farþega á fluginu með textaboðum og boðið þeim að færa sig á önnur flug. Nánari upplýsingar eru á icelandair.is.

Ekki er gert ráð fyrir að breytingar verði á morgunflugi Icelandair, FI450/451, til og frá London á miðvikudaginn, né að þessi breyting valdi röskun á öðru flugi Icelandair.