08.04.2013 09:32

Icelandair mun hefja reglulegt áætlunarflug til Newark flugvallar í New York þann 28. október næstkomandi. Flogið verður fjórum sinnum í viku, á mánudögum, þriðjudögum, fimmtudögum og laugardögum.
 
Icelandair hefur flogið JFK flugvallarins í New York í rúm 60 ár og mun halda því áfram. Í sumar flýgur Icelandair 14 sinnum í viku, eða tvö flug daglega, til JFK. Þá hefur verið flogið daglega í nokkur ár utan sumartímans.
 
“Við höfum náð að vaxa á undanförnum misserum á þessari flugleið og í vetur aukið tíðnina í 10 flug í viku og þá flogið tveimur flugvélum nánast samhliða yfir hafið og inn á JFK flugvöllinn á vissum dögum. Við teljum rétt að færa hluta af þessari starfsemi yfir á hinn alþjóðaflugvöllinn á New York svæðinu. Það skapar okkur og ferðaþjónustunni ný markaðstækifæri og eykur sveigjanleika og fjölbreytni í leiðakerfi okkar”, segir Birkir Hólm Guðnason, framkvæmdastjóri Icelandair.
 
Newark flugvöllurinn er í raun í New Jersey fylki, vestan við Hudson ána sem rennur við Manhattan. Hann þykir henta vel fyrir Manhattan og ýmis svæði í suður-, vestur- og norðurhluta New York og New Jersey, en íbúafjöldi á New York svæðinu er í heild um 25 milljónir. Flugumferð um Newark er tæplega 70% af umferðinni um JFK og á síðasta ári fóru 34 milljónir farþega um hann.
 
Newark  verður ellefti áfangastaður Icelandair í Norður Ameríku og 36. staðurinn í leiðakerfinu á þessu ári. “Það er áhugavert að hefja flug á nýrri leið við upphaf vetraráætlunar og það er til marks um þá áherslu sem við leggjum á að jafna árstíðarsveifluna í rekstrinum og auka starfsemi yfir vetrarmánuðina. Við væntum þess að þetta styrki jafnt tengiflug okkar yfir Norður-Atlantshafið og ferðaþjónustuna hér á landi”, segir Birkir.

Flugáætlun Icelandair fyrir árið 2013 er sú stærsta í sögu þess og um 15% umfangsmeiri en á síðasta ári. Newark er fjórði nýi áfangastaðurinn sem kynntur er á þessu ári, hinir eru Anchorage í Alaska, St Pétursborg í Rússlandi og Zurich í Sviss.