07.02.2013 11:37

Ferðakaupstefnan Mid-Atlantic sem hefst í kvöld er stærsta ferðakaupstefna sem haldin er á Íslandi. Hún er nú haldin í 21. skipti og hefur aldrei verið fjölmennari.

Kaupstefnan er haldin á vegum Icelandair til þess að tengja saman kaupendur og seljendur ferðaþjónustu í þeim tilgangi að styrkja og auka ferðamannastraum til Íslands. Hún er árlegur lykilviðburður í ferðaþjónustunni. Hún stendur nú yfir dagana 7. - 9.febrúar og fer fram í Laugardalshöllinni.

“Það er mikið ánægjuefni og til marks um kraftinn í atvinnugreininni að kaupstefnan í ár er sú stærsta frá upphafi og nýir þátttakendur víða að sækjast eftir þátttöku", segir Helgi Már Björgvinsson, framkvæmdastjóri sölu- og markaðssviðs Icelandair.

Fulltrúar á Mid-Atlantic eru nú tæplega 700 alls frá 21 þjóð. Að þessu sinni koma um 440 erlendir fulltrúar frá þeim löndum sem hafa mikil ferðaþjónustutengsl við Ísland í Evrópu og Norður-Ameríku og einnig frá fjarlægari mörkuðum. Á annað hundrað íslensk ferðaþjónustufyrirtæki, víðs vegar að af landinu, eru meðal þátttakenda og nýta þetta tækifæri til að kynna vöru sína og þjónustu.

Þátttakendur eru fulltrúar ferðaskrifstofa, hótela, bílaleiga, skemmtigarða og margvíslegra annarra ferðaþjónustufyrirtækja og að auki taka þátt opinber ferðamálaráð ýmissa þeirra svæða og borga sem Icelandair flýgur til í Norður-Ameríku og Evrópu.

“Ferðaþjónustan er orðin undirstöðuatvinnugrein á Íslandi og það er mikilvægt fyrir okkur að grípa öll þau viðskiptatækifæri sem bjóðast, þau koma ekki af sjálfu sér. Sá aukni áhugi sem við finnum erlendis frá er þess vegna mjög ánægjulegur. Mid-Atlantic er einn helsti vettvangur fyrir íslenska ferðaþjónustu að mynda tengsl við samstarfsaðila og selja og kynna sína vöru beint fyrir kaupendum. En einnig eru hér t.d.bandarísk fyrirtæki að kaupa ferðaþjónustu frá Norður-Evrópu sem þeir síðan selja neytendum vestra og öfugt. Ísland er miðpunkturinn í öllu þessu starfi, líkt og í leiðarkerfi okkar, en á kaupstefnunni eru kynningarfundir, sölusýningar, stuttar ferðir og þemakvöld,”segir Helgi Már.

Mid-Atlantic verður sett í Reykjavík Hilton Nordica í kvöld, fimmtudagskvöld 7. febrúar klukkan 19.00