Aðild að Saga Club

Einstaklingar 12 ára og eldri geta sótt um aðild að Saga Club, ekki fyrirtæki, félagasamtök eða aðrar stofnanir. Með því að sækja um aðild  heimila umsækjendur Icelandair að nota allar skráðar upplýsingar, þ.m.t. tölvupóstfang, til markaðssetningar og almannatengsla fyrir Icelandair, skyld félög og aðila sem Saga Club velur til samstarfs. Skoðast samþykki á þessum skilmálum sem fyrirfram samþykki í skilningi 1. mgr. 46.gr fjarskiptalaga, en umsækjandi getur afturkallað þetta samþykki á síðari stigum. Umsækjandi þarf að skrá fullt nafn á umsóknina, þ.e. fornafn, millinafn (ef við á) og eftirnafn, eins og viðkomandi er skráður í Þjóðskrá. Umsókn er aðeins tekin gild ef hún er að fullu útfyllt. Umsækjandi verður sjálfur að undirrita umsóknina, svo og tilkynningar um breytingu á heimilisfangi, símanúmeri o.þ.h. Hver korthafi má aðeins eiga einn Vildarreikning.

Til að skrá sig í Icelandair Saga Club þarf að fylla út umsóknareyðublað á www.sagaclub.is. Umsóknareyðublað fæst einnig á söluskrifstofum Icelandair. Faxnúmeri Saga Club er 5050330 og póstfangið er Icelandair Saga Club, Aðalskrifstofa Icelandair, 101 Reykjavík.

Umsækjandi byrjar að safna Vildarpunktum við skráningu í klúbbinn. Þó er hægt að fá Vildarpunkta fyrir flug sem flogin eru allt að 12 mánuðum fyrir skráningu í Saga Club.

Vildarpunktar og Kortastig

Vildarpunkta er hægt að nota sem greiðslu í punktaúttekir  hjá Saga Club. Kortastig segja eingöngu til um hvort korthafi fái aðild að Saga Silver, Saga Gold og/eða hvort kort fáist endurnýjað. Safna þarf 40.000 Kortastigum á 12 mánaða tímabili til að fá aðild að Saga Silver og 80.000 Kortastigum á 12 mánaða tímabili til að fá aðild að Saga Gold.

Sagakort

Saga Blue kort er sent til viðkomandi eftir að punktar fyrir fyrsta flugið með Icelandair hefur verið skráð inn á Saga Club reikninginn. Númerið á Saga kortinu er félaganúmer í Saga Club. Sagakortsnúmerið er 10 stafa og er skráð framan á Sagakortinu ásamt nafni korthafa.

Ef félagi í klúbbnum breytir um nafn þarf viðkomandi að óska skriflega eftir slíkri breytingu við Saga Club. Framvísa þarf skjali frá Þjóðskrá sem staðfestir nafnabreytinguna.

Korthafi telst sá sem kortið er stílað á. Honum einum er heimilt að nota kortið. Kortið er ekki greiðslukort. Kortið er og verður eign Icelandair.

Ef Sagakort glatast er hægt að panta nýtt kort á www.sagaclub.is gegn vægu gjaldi.  Það tekur að jafnaði 7-8 virka daga að berast til viðkomandi innan Íslands en gera má ráð fyrir 10 – 21 virkum dögum utan Íslands. Einnig er hægt að hringja í síma 5050100 eða senda póst á okkur og panta nýtt kort. 

Saga Silver

Saga Silver kort gildir í 12 mánuði. Nái Saga Silver korthafi 30.000 Kortastigum á 12 mánaða gildistíma kortsins fær hann Saga Silver kortið endurnýjað.

Saga Gold

Saga Gold kort gildir í 12 mánuði. Nái Saga Gold korthafi 70.000 Kortastigum á 12 mánaða gildistíma kortsins fær hann Saga Gold kortið endurnýjað.

Punktasöfnun

Áætlunarflug Icelandair gefur bæði Vildarpunkta og Kortastig. Viðskipti við samstarfsaðila gefa eingöngu Vildarpunkta. Einungis miðar sem keyptir eru á skráðu fargjaldi gefa punkta. Punktafjöldi miðast við það faragjald sem keypt er og korthafi greiddi fyrir en ekki við farrýmið sem korthafi notar í reynd þ.e. ef korthafi  er uppfærður milli farrýma.  Hægt er að fá allar upplýsingar um punktasöfnun hér.

Engir Vildarpunktar fást fyrir miða sem gefnir eru út samkvæmt sérstökum samningum eða tilboðum. Vildarpunktar og Kortastig ávinnast fyrir flugferðir í áætlunarflugi Icelandair sem korthafi sjálfur fer í óháð hver greiðir fyrir flugfarið. Engir punktar eru veittir fyrir farseðla sem eru keyptir en eru síðan ekki notaðir. Félagi í Saga Club fær punkta fyrir flug sem hann flýgur sjálfur en fær ekki punkta fyrir flugmiða sem hann kaupir fyrir aðra.

Í hvert skipti sem flugfar er pantað á áætlunarleiðum Icelandair eða þjónusta hjá samstarfsaðilum þarf að framvísa Sagakortinu eða gefa sölumanni upp Sagakortsnúmerið og nafn eins og það er skráð á kortinu. Kortanúmerið verður að skrá við allar bókanir því annars skila punktar sér ekki á Saga Club reikninginn. Framvísa þarf Sagakortinu á afgreiðslustað bílaleigu, við innritun á hótel og þegar verslað er í Saga Shop.  

Erfðir

Vildarpunktar eru ekki erfanlegir og verða almennt ekki millfærðir við andlát félaga í Saga Club. Þrátt fyrir framgreint getur einn lögerfingi hans fengið Vildarpunkta flutta yfir á sinn Vildarreikning.

Til þess að sækja um að erfa Vildarpunkta skal viðkomandi senda eftirfarandi:

  • Staðfestingu, t.d. frá sýslumanni, til Saga Club um að hann sé lögerfingi hins látna eða sitji í óskiptu búi. 
  • Ef um fleiri en einn lögerfingja er að ræða verður að fylgja samþykki frá öðrum lögerfingjum fyrir þeim eina sem á að erfa Vildarpunktana. 
  • Á skjalinu er nauðsynlegt að nöfn og kennitölur beggja aðila komi fram. 

Punktastaða

Til að sjá punktastöðuna sína þurfa félagar að skrá sig inn á síður Saga Club með notendanafni og lykilorði.

Hafi korthafi ekki aðgang að Netinu getur hann haft samband við Þjónustuver Icelandair í síma 5050100 og fengið punktayfirlit sent í pósti eða sent póst á okkur og óskað eftir punktayfirliti.

Punktar fyrir flug með Icelandair eru skráðir 3 sólarhringum eftir flug en punktar frá samstarfsaðilunum eru skráðir mánaðarlega.

Korthöfum er eindregið ráðlagt að fara vel yfir yfirlitin og athuga hvort allar flugferðir og þjónusta hafa verið skráðar. Til öryggis ætti korthafi ávallt að geyma alla flugmiða, brottfararspjöld og kvittanir.

Punktanotkun

Þegar korthafi hefur safnað nægum Vildarpunktum getur hann sótt um Vildarferð eða aðra Vildarþjónustu. Hægt er að nota punktana í flug,í verslun í Saga Shop Collection og Saga Shop Kitchen, hótelgistingu og bílaleigu innanlands sem utan.  Hægt er að finna allar upplýsingar um punktanotkun hér 

Uppfærsla fyrir Vildarpunkta

Korthafi getur notað Vildarpunkta til að greiða fyrir uppfærslu fyrir hluta ferðarinnar t.d. aðra leiðina eða fyrir báðar leiðir. Ekki er hægt að breyta uppfærslunni aftur í Vildarpunkta. Barnaafsláttur er ekki veittur af uppfærslu milli farrýma. Saga Club félagar geta notað Vildarpunkta til að uppfæra sig frá Economy Flex farrými upp á Economy Comfort eða frá Economy Comfort upp á Saga Class.

Þegar uppfært er fyrir punkta á milli farrýma nýtur þú þess þjónustuauka sem Economy Comfort eða Saga Class hafa upp á að bjóða. Þeir skilmálar sem gilda um fargjaldið sem greitt var fyrir haldast óbreyttir. Punktasöfnun miðast áfram við það fargjald sem greitt var fyrir.

Bóka  verður  uppfærslu hjá Þjónustuveri Icelandair eða  á söluskrifstofum Icelandair fyrir brottför. Aldrei er hægt að uppfæra fyrir punkta við innritun á flugvöllum.  Hægt er að finna allar upplýsingar um uppfærslu fyrir Vildarpunkta hér

Kaupa og millifæra Vildarpunkta

Hægt er að kaupa Vildarpunkta fyrir sjálfan sig og líka er hægt að kaupa Vildarpunkta til að gefa öðrum. Einnig geta korthafar millifært Vildarpunkta á milli kortareikninga. Til að Kaupa, Gefa eða Millifæra Vildarpunkta þurfa félagar að skrá sig inn með notendanafni og lykilorði. Færslugjald er innheimt fyrir hverja færslu. Nánari upplýsingar hér.

Fyrning Vildarpunkta

Vildarpunktar gilda í allt að 4 ár þ.e. almanaksárið sem Vildarpunktar ávinnast og næstu 3 ár. Ef korthafi nýtir ekki Vildarpunktana á þessu tímabili falla þeir niður 31. desember. Kortastig fyrnast á 12 mánuðum. 

Samstarfsaðilar

Upplýsingar um punktasöfnun og punktanotkun hjá samstarfsaðilum Saga Club má finna á vefsíðu klúbbsins www.sagaclub.is.

Annað

Icelandair áskilur  sér rétt til að leggja Saga Club niður eða breyta honum hvenær sem er, með því eða án þess að tilkynna slíkt sérstaklega. Í þessu felst réttur Icelandair til að fella niður eða breyta reglum, punktakerfi, skilmálum við afhendingu Vildarþjónustu og úthlutun korta. Verði Saga Club lagður niður, er Icelandair heimilt að fella niður alla áunna punkta. Icelandair mun leitast við að tilkynna korthöfum fyrirfram ef tekin verður ákvörðun um að leggja Saga Club niður. Icelandair bera enga ábyrgð á tjóni eða tapi sem korthafar kunna að verða fyrir vegna breytinga á reglum þessum eða vegna þess að Saga Club er lagður niður.

Allar breytingar á reglum þessum eru bindandi fyrir korthafa 30 dögum eftir að honum var send tilkynning þess efnis. Vilji korthafi ekki samþykkja gerða breytingu skal hann skila korti sínu, klipptu í tvennt, til Icelandair innan 30 daga frá því að honum var send tilkynning um breytinguna. Korthafi telst samþykkja breytingar ef hann notar kort sitt, pantar Vildarferð eða notar aðra þjónustu sem í boði er.

Félögum í  Saga Club er óheimilt er að framselja Vildarferðir. Icelandair áskilur  sér rétt til að gera Vildarferð upptæka komi í ljós að hún hafi verið misnotuð. Brot á reglum þessum, svo og öðrum reglum Saga Club, geta leitt til þess að kort verði tekið af korthafa og til niðurfellingar á punktum.

Vildarþjónusta og allar Vildarferðir eru boðnar með fyrirvara um breytingar og nægilegt sætaframboð. Icelandair hefur gert samstarfssamninga við aðra aðila um að veita korthöfum ákveðna þjónustu. Icelandair mun leitast við að sjá til þess að slíkir þjónustuþættir verði í boði en ábyrgjast það ekki. Icelandair er ekki ábyrgt fyrir skaða sem hlýst af vanefndum samstarfsaðila. Icelandair ábyrgist heldur ekki skaða vegna þess að slíkur samstarfsaðili hættir þátttöku í Saga Club.

Félagar Saga Club verða eðli málsins samkvæmt að lúta skilmálum klúbbsins líkt og þeir eru á hverjum tíma en geta ella sagt sig úr klúbbnum með því að senda skriflega ósk þar um  telji þeir sig ekki geta sætt sig við efni skilmálanna.

Skilmálar Vildarferða

Kynntu þér skilmála almennra Vildarferða hér
Kynntu þér skilmála tilboðs Vildarferða hér